„Djathë" që s'është djathë, „kaçkavall" me vaj palme në vend të qumështit - një mashtrim po aq i vjetër sa vetë supermarketet. Në fqinjësi më në fund vendosën ta vënë nën kontroll: Republika Sërpska futi një rregull sipas të cilit imitimet e qumështit me vaj palme apo vaj tjetër bimor duhet të mbajnë një etiketë të kuqe të qartë se „nuk janë produkt qumështi 100 për qind".

Rregullat janë konkrete. Produktet që përmbajnë yndyrna bimore duhet të qëndrojnë në vitrina dhe rafte të veçanta, të ndara nga produktet e vërteta të qumështit. Janë të ndaluar edhe emërtimet mashtruese - „djathë", „djathë vegjetarian", „analog djathi" e të ngjashme - si dhe figurat që të kujtojnë qumështin nëse produkti nuk e përmban. Rregullorja hyri në fuqi më 5 qershor.

Për konsumatorin kjo është një fitore e rëndësishme. Me vite në rafte qëndrojnë produkte të paketuara që të duken si të vërteta, ndërsa në përbërje - tjetër histori, që shkronjat e imta rrallë e zbulojnë në shikim të parë. Kur të detyrohen të mbajnë etiketë të kuqe dhe të rrinë mënjanë, loja me mashtrimin bëhet më e vështirë.

Pyetja që vjen vetvetiu është: po te ne? Ndërsa fqinjët mbrojnë konsumatorët e tyre dhe bulmetorët vendas nga konkurrenca jolojale, blerësi maqedonas ende duhet vetë të lexojë përbërjen e imët dhe të hamendësojë çfarë po çon në të vërtetë në shtëpi. Ndoshta është koha që edhe institucionet tona të „kujtojnë" se mbrojtja e konsumatorit nuk është luks, por detyrim.