Çmimi i arit ra 2% dje, duke arritur rreth 4.570 dollarë për ons, duke lëvizur drejt rënies më të madhe javore që nga viti 1983. Gjatë javës, ari humbi ndërmjet 9 dhe 10% të vlerës.

Eskalimi i tensioneve në Lindjen e Mesme i rriti në mënyrë drastike çmimet e energjisë dhe i minoi shpresat për ulje të shpejtë të normave të interesit, sipas Trading Economics.

Presioni mbi arin, i cili tradicionalisht shërben si strehë në periudha inflacioni të lartë, vjen nga rritja e rendimenteve të obligacioneve shtetërore, dollari i fortë dhe marrja e fitimeve nga investitorët që i likuidojnë pozicionet për të kompensuar humbjet në tregje tjera.

Rezerva Federale, Banka Qendrore Europiane, Banka e Anglisë dhe Banka e Japonisë i mbajtën të qëndrueshme normat e interesit këtë javë, por sinjalizuan gatishmëri për shtrëngim shtesë të politikës monetare nëse presionet inflacioniste vazhdojnë.