Një banor 43-vjeçar i Gjevgjelisë u arrestua pasi doli nga rruga me automjetin në të cilin transportonte gjashtë migrantë nga Egjipti, njoftoi Ministria e Punëve të Brendshme.

Aksidenti ndodhi më 11 prill rreth orës 21:20 në rrugën rajonale Bogdanci-Gjevgjeli, në vendin e quajtur Sharen Most (Ura e Larme), kur një automjet pasagjerësh Volkswagen me targa bullgare doli nga karrexhata.

Shoferi pas aksidentit u largua nga vendi i ngjarjes, por më vonë u gjet dhe u arrestua nga policia. Në vendngjarje u gjetën gjashtë migrantë nga Egjipti, njëri prej të cilëve pësoi lëndime të rënda trupore dhe u transferua në Qendrën Klinike Nënë Tereza në Shkup.

MPB njofton se ekziston dyshim i bazuar për veprën penale kontrabandë e migrantëve, ndërsa për rastin është njoftuar prokurori publik i Prokurorisë Themelore Publike të Gjevgjelisë.

Ky rast është pjesë e një serie incidentesh të lidhura me transportin ilegal të migrantëve nëpër pjesën jugore të vendit, veçanërisht në rajonin e Gjevgjelisë, i cili ndodhet në njërën nga rrugët kryesore të tranzitit për migracion.