Dy jutjuberë austriakë publikuan një video për të cilën pohojnë se tregon hyrjen e tyre të paautorizuar në aeroportin ushtarak „Kolonel-pilot Milenko Pavlović“ në Batajnicë pranë Beogradit. Në incizim shihet si hipin nëpër aeroplanë ushtarakë dhe shëtisin lirshëm nëpër kompleks. Askush nuk i pyeti çfarë kërkonin atje.

Videoja u publikua në kanalin „Roofless TV“ dhe brenda disa ditësh mblodhi më shumë se gjysmë milioni shikime. Sipas autorëve, një pjesë e incizimit vjen nga Kazakistani, pas së cilës ngjarja kalon në Serbi. Dy të rinjtë së pari i incizojnë aeroplanët nga jashtë, përmes gardhit, e pastaj edhe nga brendësia e vetë objektit ushtarak.

I vizitonin mjetet fluturuese që dukshëm nuk përdoren më, hynin në disa prej tyre dhe i incizonin. Në një moment incizuan edhe uljen e një aeroplani. Nga materiali i publikuar del se gjatë gjithë kohës në territorin e mbrojtur nuk takuan asnjë të punësuar. Si hynë, ende nuk dihet.

Autorët e kanalit janë dy të rinj vjenezë që prezantohen si eksplorues të lokacioneve të fshehura. Kanali është i njohur për të ashtuquajturat eksplorime „urbex“ të vendeve të braktisura dhe të ndaluara, si dhe për bëma parkuri. Me fjalë të tjera, ky është zanati i tyre - dhe pikërisht për këtë meritojnë rezervë: bëhet fjalë për pohimin e tyre dhe montazhin e tyre, e jo për incident të konfirmuar zyrtarisht.

Problemi është në atë që pason. Ministria e Mbrojtjes e Serbisë dhe policia deri tani nuk e kanë komentuar rastin. Aeroporti në Batajnicë është rreth njëzet kilometra larg Beogradit, u ndërtua mes viteve 1947 dhe 1951, ndërsa sot në të është vendosur Baza e 204-t Ajrore e Forcave Ajrore dhe Mbrojtjes Kundërajrore të Ushtrisë së Serbisë. Nëse videoja është e vërtetë, dy djem me kamerë shëtitën nëpër një bazë ajrore ushtarake në pragun e Beogradit. Nëse nuk është, dikush duhej tashmë të dilte dhe ta thoshte këtë.

Heshtja është opsioni më i keq. Kur gjysmë milioni njerëz shikojnë si të huaj hipin nëpër aeroplanë ushtarakë, ndërsa institucioni që shpenzon para për siguri nuk ka asnjë fjali, pyetja nuk është më për dy jutjuberët. Sa vlejnë vlerësimet e sigurisë nëse gardhi i një aeroporti ushtarak mund të kapërcehet me kamerë në dorë - dhe a po i kontrollon dikush në rajon gardhet e veta tani?