Çmimet e benzinës dhe dizelit në Maqedoni rriten në mënyrë dramatike javën e dytë radhazi, si pasojë e veprimeve ushtarake të SHBA-së dhe Izraelit kundër Iranit që provokuan rritje të çmimeve të naftës së papërpunuar në tregjet globale.

Benzina shtrenjohet për 7 denarë, ndërsa dizeli për 6,5 denarë për litër, njoftoi Komisioni Rregullator për Energjetikë. Çmimet e reja hyjnë në fuqi nga mesnata.

Përveç çmimit të naftës së papërpunuar, mbi çmimin përfundimtar ndikon edhe kursi i dollarit i cili gjithashtu u rrit për shkak të tensioneve në Lindjen e Mesme.

Sipas metodologjisë së Komisionit, te benzina deri në 49,9 përqind e çmimit përcaktohet nga tregu botëror, ndërsa te dizeli deri në 54,6 përqind. Detyrimet shtetërore marrin pjesë me deri në 43,2 përqind te benzina dhe 36,6 përqind te dizeli.

Metodologjia nuk lejon kontroll të drejtpërdrejtë të çmimeve, por autoritetet mund ta ulin akcizën deri në 4 denarë ose TVSH-në e importit nga 18 në 10 përqind në situata krize. Shoferët bënë radhë para pompave duke u përpjekur të mbushin karburant me çmimet e vjetra.