Irani e forcon kontrollin mbi Ngushticën e Hormuzit, ndërsa anijet detyrohen t'i koordinojnë kalimet me autoritetet iraniane. Tajlanda raportoi se një tanker i saj kaloi me sukses pas negociatave me përfaqësuesit iranianë, ndërsa një tjetër ende pret miratimin.

Sigurimi i anijeve pësoi shtrenjtësim dramatik. Primet e rrezikut të luftës, të cilat më parë ishin 0,15 deri 0,25 përqind e vlerës së anijes, tani arrijnë 5 deri 10 përqind. Për tanker të madh nafte të papërpunuar me vlerë rreth 100 milionë dollarë, kjo do të thotë kosto shtesë prej disa milionë eurosh për tranzit.

"Primet u rritën ndjeshëm pas eskalimit të ngjarjeve nga 28 shkurti", deklaroi David Osler, redaktor financiar i "Lloyd's List".

Disa kompani e shmangin plotësisht ngushticën, por naftësjellësit nëpër Arabinë Saudite dhe EBA ofrojnë vetëm alternativë të pjesshme. Pjesa më e madhe e eksportit global të naftës ende varet nga ky korridor kritik detar.

Analisti energjetik Bill Farren-Price paralajmëroi se ndërprerja e vazhdueshme mund të shkaktojë tronditje serioze në furnizimin e tregjeve globale.