Në Islamabad, Pakistan, këtë fundjavë fillojnë zyrtarisht negociatat ndërmjet Shteteve të Bashkuara të Amerikës dhe Iranit, me qëllim arritjen e një armëpushimi të qëndrueshëm dhe zgjidhjen e krizës ndërmjet dy vendeve. Pakistani është nikoqir dhe ndërmjetës në këto bisedime historike.

Delegacionin amerikan e udhëheq zëvendëspresidenti Xhej Di Vens, i shoqëruar nga përfaqësuesi i posaçëm Stiv Benon dhe Xhared Kushner. Vens deklaroi se SHBA-ja i qaset negociatave „me ndjenjë optimizmi", por paralajmëroi se Irani nuk duhet të përpiqet t'i tejkalojë amerikanët.

Delegacioni iranian numëron 71 anëtarë, duke përfshirë negociatorë, ekspertë, përfaqësues medialë dhe personel sigurie. Atë e udhëheqin kryetari i parlamentit iranian Mohammad Bager Galibaf dhe ministri i Punëve të Jashtme Abas Aragçi, i cili pas mbërritjes deklaroi: „Kemi qëllime të mira, por nuk kemi besim".

Kryeministri pakistanez Shehbaz Sharif i vlerësoi bisedimet si „moment vendimtar" për një armëpushim të qëndrueshëm, duke theksuar se ndërmjetësimi është „moment krenarie jo vetëm për Pakistanin, por edhe për gjithë botën myslimane".

Sipas burimeve, propozimi i presidentit Trump përmban 15 pika, duke përfshirë kërkesat që Irani të heqë dorë nga armët bërthamore, të dorëzojë uraniumin e pasuruar në shkallë të lartë, të kufizojë kapacitetet mbrojtëse dhe të rihapë Ngushticën e Hormuzit.

Presidenti Trump paralajmëroi se ushtria amerikane është e gatshme për sulme të reja ndaj Iranit nëse negociatat dështojnë, duke deklaruar se forcat janë të pajisura me „armët më të fuqishme të krijuara ndonjëherë". Negociatat po zhvillohen pas marrëveshjes dyjavore për armëpushim, të shpallur më herët këtë javë.