Kriza e Lindjes së Mesme mund të ketë ndikim të kufizuar mbi disa nga destinacionet nga aeroportet maqedonase, njoftoi TAV Maqedonia. Tani për tani nuk priten ndërprerje më të mëdha të trafikut ajror.

Ndryshimi i vetëm është vendimi i Wizz Air për anulimin e linjës së rregullt Shkup-Larnaka nga 13 prilli, e cila do të vazhdojë të operojë vetëm sezonalisht në muajt e verës.

"Nuk presim ndryshime të konsiderueshme në numrin e përgjithshëm të fluturimeve dhe pasagjerëve", deklaroi drejtori i përgjithshëm Nexhat Kurt, duke theksuar se pjesa më e madhe e trafikut në aeroportet e Shkupit dhe Ohrit është e drejtuar drejt Evropës Perëndimore dhe Veriore, jo drejt Lindjes së Mesme.

TAV Maqedonia raportoi për vit të suksesshëm 2025 dhe sezon të fortë dimëror, me pritje për rritje të qëndrueshme dhe zgjerim të rrjetit të destinacioneve në periudhën e ardhshme.