Maqedonia dhe SHBA-ja më 7 prill do të mbajnë sesion të dialogut strategjik në Uashington, njoftoi ministri i Punëve të Jashtme Timço Mucunski. Maqedonia do të jetë vendi i parë në Evropë që në mandatin e administratës së re amerikane do të mbajë dialog të tillë.

Delegacionin maqedonas do ta udhëheqë Mucunski, ndërsa në të do të jenë edhe ministrat e Punëve të Brendshme Pançe Toshkovski, i Mbrojtjes Vllado Misajlovski, i Transformimit Digjital Stefan Andonovski dhe i Energjetikës Sanja Bozhinovska.

Nga pala amerikane, nikoqir do të jetë zëvendëssekretari i Shtetit Kristofer Landau. Dialogu strategjik përfshin tema nga siguria dhe mbrojtja, energjetika, ekonomia dhe investimet, si dhe sundimi i ligjit dhe gjeopolitika.

Ky mekanizëm i nivelit të lartë u rivendos në vitin 2022 dhe përfaqëson kornizën për bashkëpunim afatgjatë strategjik midis dy vendeve.