Maqedonia përgatitet për një moment të rëndësishëm në marrëdhëniet bilaterale me SHBA-në - dialog strategjik i caktuar për 7 prill në Uashington, ku delegacionin do ta udhëheqë ministri i punëve të jashtme Timço Mucunski.

Takimi vlerësohet si test për pjekurinë politike të vendit para partnerit strategjik. Maqedonia do të jetë vendi i parë në Evropë që do të ketë seancë dialogu strategjik me Uashingtonin në këtë format.

Dialogu do të përfshijë çështje të sigurisë, mbrojtjes dhe integrimeve euroatlantike, në kontekstin e situatës së përkeqësuar gjeopolitike në nivel global. Nga suksesi i këtyre bisedimeve do të varet thellimi i mëtejshëm i partneritetit.

Dialogu strategjik vjen në periudhën kur Maqedonia përpiqet ta forcojë pozicionin e saj në NATO dhe ta përshpejtojë rrugën drejt BE-së, ndërsa mbështetja e Uashingtonit mbetet kyçe për të dy proceset.