Zëvendëskryeministri Aleksandar Nikoloski në debatin parlamentar sulmoi ashpër Levicën, duke e akuzuar se me "histeri" rreth urbanizimit po e bllokon zhvillimin e shtetit dhe po shkakton rritjen e çmimeve të banesave.

"Për shkak të histerisë që e krijon Levica, nuk miratohen plane, nuk ndërtohet dhe rritet çmimi i banesave, ndërsa të rinjtë shpërngulen", deklaroi Nikoloski, duke paralajmëruar se çmimi për metër katror mund të arrijë 5.000 euro nëse vazhdon bllokada e planeve urbanistike.

Sipas tij, çmimi aktual në Shkup është rreth 2.500 euro për metër katror, ndërsa në Ohër arrin 4.000 euro. Nikoloski theksoi edhe iniciativat qeveritare për tërheqjen e zinxhirëve Lidl dhe Spar, si dhe ndryshimet ligjore për ndërtimin më të lehtë të kopshteve, spitaleve dhe parkimeve.

Deputeti i Levicës Amar Mecanoviq ia ktheu me akuza se Qeveria punon "në dobi të oligarkisë" dhe se politikat e tyre do ta shndërrojnë popullin në qiramarrës ndërsa oligarkët ndërtojnë dhe përfitojnë. Ai kërkoi ligj për kufizimin e qirave.