Shërbimi maqedonas i Radio Evropës së Lirë (REL) do të mbyllet më 31 mars, në një goditje që shënon fundin e një epoke për gazetarinë profesionale në vend.

REL në gjuhën maqedonase operon që nga viti 2001, ndërsa shërbimi mediatik u themelua qysh në vitin 1950 dhe financohej nga Kongresi amerikan. Arsyeja e mbylljes është vendimi i presidentit Donald Trump për të pezulluar financimin e REL-it.

Me të njëjtin vendim u pezullua edhe financimi i Zërit të Amerikës, i cili gjithashtu kishte shërbim në gjuhën maqedonase. Dy mediat së bashku konsideroheshin ndër më profesionalet në Maqedoni.

Mbyllja e REL-it vjen pas mbylljes së Al Jazeera Balkans disa muaj më parë, e cila gjithashtu kishte zyrë në Maqedoni dhe konsiderohej ndër mediat më profesionale në Ballkan.

Ekspertët e mediave paralajmërojnë se humbja e këtyre shërbimeve mediatike ndërkombëtare paraqet goditje serioze për informimin e qytetarëve dhe pluralizmin mediatik në vend.