Rusia në mënyrë agresive e promovon aplikacionin e saj Maks, rrjet social pa enkriptim, ndërsa njëkohësisht i bllokon WhatsApp dhe Telegram - dy aplikacionet më të njohura mes përdoruesve në vend.

"Fare nuk ka trafik WhatsApp. Praktikisht nuk ekziston. WhatsApp është i vdekur, Telegram po vdes. Ndërkohë, trafiku i Maks rritet me shpejtësi", deklaroi drejtori i operatorit rus të telekomunikacionit Rostelekom, Mihail Osejevski, në kongresin e Bashkimit Rus të Industrialistëve.

Vendosja e Maks shkakton shqetësim mes kritikëve dhe organizatave për të drejtat dixhitale, të cilët paralajmërojnë se Moska mund ta përdorë aplikacionin për mbikëqyrje të qytetarëve. "Të gjitha të dhënat që kalojnë nëpër këtë aplikacion mund të konsiderohen si të aksesueshme për pronarin e saj, në këtë rast shtetin rus", tha eksperti i sigurisë kibernetike Batist Rober.

Aplikacioni u lansua në vitin 2025 nga gjiganti teknologjik rus VK dhe shpesh krahasohet me WeChat kinez pasi kombinon rrjetin social dhe platformën komunikuese me akses në shërbimet shtetërore, identifikimin dixhital dhe bankimin.

Edhe pse nuk është zyrtarisht i detyrueshëm, autoritetet qartë sinjalizojnë se jeta pa Maks do të jetë gjithnjë e më e vështirë. Presidenti Vladimir Putin e promovon si platformë më të sigurt që i plotëson kërkesat për "sovranitet teknologjik" të vendit.