Projekti „Safe City“ (Qyteti i Sigurt) tregon rezultate të dukshme - nga fillimi i vitit numri i aksidenteve rrugore në Maqedoni është ulur për gati 10 përqind.

Në periudhën janar-shkurt 2026 janë regjistruar gjithsej 929 aksidente rrugore, që është 9,8 përqind më pak se periudha e njëjtë e vitit 2025 kur ishin regjistruar 1.030 aksidente.

Nga nisja e projektit në shkurt deri në fillim të prillit, sistemi ka regjistruar gjithsej 46.970 shkelës - numër alarmant për kulturën e trafikut në rrugët maqedonase. Madje 45.001 prej tyre ishin për shpejtësi të tepërt.

Përveç shkelësve të shpejtësisë, sistemi ka regjistruar edhe 1.679 shkelës për drejtim automjeti me patentë të skaduar dhe 290 për kalim në dritën e kuqe.

Projekti së shpejti do të zbatohet edhe në Ohër dhe Strumicë, ku tashmë po vendosen kamera për kontrollin digjital të trafikut.