Administrata e Donald Trump i ka dorëzuar Iranit një plan me 15 pika për t'i dhënë fund konfliktit, duke kërkuar armëpushim njëmujor për të diskutuar propozimin, transmetojnë mediat botërore duke iu referuar "Kanalit 12" izraelit.

Pesë pikat e para të planit kanë të bëjnë me sektorin bërthamor. Uashingtoni kërkon që Irani kurrë të mos përpiqet të sigurojë armë bërthamore, të dorëzojë të gjithë lëndën bërthamore të pasuruar në një datë të caktuar, si dhe të çmontohen disa objekte kyçe bërthamore.

Irani do të duhet të heqë dorë nga mbështetja e grupeve si Hezbollahu dhe Hamasi, të ndalojë financimin dhe armatimin e tyre. Parashikohen edhe kufizime për numrin e raketave me të cilat vendi mund të disponojë dhe për rezen e tyre.

Gjithashtu, Ngushtica e Hormuzit, nëpër të cilën kalojnë rreth 20 përqind e dërgesave botërore të lëndëve djegëse fosile, do të duhet të mbetet e hapur për lundrimin.

Kërkesat u dorëzuan nëpërmjet ndërmjetësimit të Pakistanit, i cili ruan marrëdhënie të mira me të dyja palët. Zëdhënësi i forcave të armatosura iraniane tha për planin se amerikanët në fakt po negociojnë vetëm me veten, duke shtuar: "Dikush si ne kurrë nuk do të pajtohet me dikë si ju".

Komentet vijnë pasi Trump tha se Irani "aq dëshpërimisht" dëshiron marrëveshje dhe se i ka dhënë SHBA-së "një dhuratë shumë të madhe me vlerë të jashtëzakonshme".