Ministria e Punëve të Brendshme (MPB) konfirmoi se mbrëmë ka pasur tentim-zjarrvënie në një objekt të Bashkësisë Hebraike në Maqedoni, si dhe në sinagogën e Shkupit.

Nga MPB informojnë se menjëherë pas raportimit, ekipet policore dolën në terren dhe ndërmorën veprime për përcaktimin e rrethanave dhe gjetjen e kryerësve.

Gjatë inspektimit, në oborrin e objektit fetar u gjet një bidon me karburant, çka tregon qëllimin për shkaktimin e zjarrit. Në derën hyrëse u vërejtën gjurmë të dukshme djegieje.

Informacionet për incidentin u ndanë edhe nga Ambasada e Izraelit në Maqedoninë e Veriut, prej ku u publikuan fotografi dhe materiale video nga vendi i ngjarjes, duke përfshirë imazhe në të cilat shihen dy persona duke kapërcyer gardhin dhe duke spërkatur lëng të ndezshëm.

Institucionet kompetente njoftojnë se hetimi është në vazhdim dhe se do të merren të gjitha masat e nevojshme për sqarimin e plotë të rastit. Incidenti shkaktoi dënime të ashpra nga opinioni vendas dhe ndërkombëtar.