Gjyqi për zjarrin në diskotekën "Puls" në Koçan vazhdoi me dëshmi, një ditë pas shënimit të përvjetorit të tragjedisë në të cilën humbën jetën 63 persona dhe më shumë se 200 u plagosën.

Në seancën në Idrizovë dëshmuan tre dëshmitarë. Deri tani rreth 25 dëshmitarë të prokurorisë kanë dhënë dëshmi që kur procesi filloi më 19 nëntor.

Në seancën e mëparshme, inspektori Darko Stojkov nga Drejtoria për Mbrojtje dhe Shpëtim përshkroi mangësi kritike sigurie: hidranti ishte pa ujë, nuk kishte zorrë as alarm zjarri, ndërsa dalja e pasme ishte e mbyllur me dry pa dorezë. Ai tregoi se zyra e Drejtorisë në Koçan nuk ka inspektor për më shumë se një dekadë.

Të akuzuar janë 35 persona dhe tre subjekte juridike, mes të cilëve pronari i diskotekës, inspektorë shtetërorë, ish-ministra dhe të punësuar në sigurimin fizik. Të gjithë të akuzuarit e mohojnë fajin.

63 karrige të bardha mbetën bosh në sallën e gjyqit si simbol i jetëve të humbura. Gjyqin e udhëheq gjyqtarja Dijana Gruevska-Ilievska, me ekip prej 15 prokurorësh publikë.