Nënpresidenti amerikan Xhej Di Vens kritikoi ashpër Bashkimin Evropian për ndërhyrje të supozuar në zgjedhjet e ardhshme hungareze, duke deklaruar hapur se ka ardhur në Budapest për t'i ndihmuar kryeministrit Viktor Orban.

"Burokratët në Bruksel u përpoqën të shkatërrojnë ekonominë hungareze" dhe "u përpoqën të zvogëlojnë pavarësinë energjetike të Hungarisë", tha Vens për gazetarët.

Në tubimin parazgjedhor, Vens e përfshiu presidentin Donald Trump përmes telefonit, i cili tha: "E dua Hungarinë dhe e dua atë Viktor. Ka bërë punë fantastike."

Zgjedhjet mbahen në një kohë kur Orbani, pas 16 vitesh në pushtet, përballet me mundësinë e humbjes ndaj rivalit Peter Madjar, partia e të cilit Tisza prin në anketa. Madjari u përgjigj: "Asnjë shtet i huaj nuk guxon të ndërhyjë në zgjedhjet hungareze."

Vens e lavdëroi varësinë e Hungarisë nga energjia ruse, duke mbështetur kështu pozicionin e Orbanit. Bloomberg raportoi më parë se Orbani i kishte thënë Putinit në tetor: "Në çdo gjë që mund të jemi në ndihmë, jemi në dispozicionin tuaj."