Serbia mbajti zgjedhje lokale në 10 qytete dhe komuna, ndërsa presidenti Aleksandar Vuçiç shpalli fitore me rezultat "10-0" për koalicionin e udhëhequr nga Partia Përparimtare Serbe (SNS).

Procesi zgjedhor u karakterizua me incidente të shumta, përleshje fizike dhe parregullsi. Vëzhguesit opozitarë dhe lëvizja studentore raportuan frikësim të votuesve, sulme ndaj aktivistëve dhe gazetarëve, si dhe dëmtime të dokumentuara të procesit zgjedhor.

Rezultati më i ngushtë u regjistrua në komunën Kula në Vojvodinë, ku koalicioni qeverisës fitoi me dallim prej 530 votash. Në komunat e tjera, SNS fitoi shumicë bindëse - nga 52.96% në Aranxhelovc deri në 71.98% në Kladovë.

Gjatë numërimit të votave, policia kreu kontroll në ambientet e Lëvizjes Kombëtare opozitare të Serbisë. Rreth 250.000 qytetarë kishin të drejtë vote në këto zgjedhje.