Kuvendi i Maqedonisë me 68 vota "pro" dhe 15 "kundër" e zgjodhi Aco Ristovin kryetar të ri të Komisionit Rregullator të Energjisë (KRE), në vendin e Marko Bislimovski i cili dha dorëheqje në shkurt.

Ristov është inxhinier i diplomuar i elektroteknikës me tri dekada përvojë në energjetikë, hidroenergjitikë dhe sisteme infrastrukturore. Koalicioni qeveritar e prezantoi si "kuadër jashtëzakonisht të kualifikuar që i plotëson të gjitha kushtet ligjore".

Opozita reagoi ashpër ndaj zgjedhjes. Koordinatori i LSDM-së, Oliver Spasovski, pretendon se Ristov zotëron tri hidrocentrale të vogla dhe ka interesa biznesi përmes kompanive "Alfa Inxhiniering", "Hidroenerxhi Grup" dhe "MHC Kozja Reka", gjë që përfaqëson konflikt interesi për rregullimin e çmimeve të energjisë.

Deputeti i Levicës, Amar Mecinoviç, njoftoi se emërimin do ta kontestojë para Komunitetit Energjetik në Vjenë, duke pretenduar se shkelen kriteret e pavarësisë. "Rregullatori nuk merr arbitër, por njeri nga biznesi energjetik me bagazh partiak", porositi Mecinoviç.

Shqetësim shtesë shkakton edhe fakti se bashkëshortja e Ristovit, Danka Ristova, kohët e fundit u emërua në Këshillin Gjyqësor, gjë që opozita e sheh si pjesë e vendosjes sistematike të kuadrove partiake në organet rregullatore. Qytetarët që përballen me fatura të rritura të energjisë kërkojnë mbikëqyrje vërtet të pavarur mbi çmimet.