Pacientët me diabet në Maqedoni me muaj përballen me mungesë serioze të barnave, insulinës, shiritve testuese dhe sensorëve të glukozës. Gjendja është alarmante, ndërsa të sëmurët kronikë janë të detyruar vetë të blejnë terapi ose të ndajnë resurset.

Kryetari i Bashkimit të Shoqatave për Diabet, Dime Velev, paralajmëroi se situata zgjat tashmë disa muaj dhe i godet veçanërisht pacientët me diabet tip 1, të cilët janë plotësisht të varur nga terapia me insulinë. "Nuk kemi mjaftueshëm terapi për diabetikët. Sensorët janë të arritshëm në sasi të kufizuara, shpesh vetëm për një muaj", deklaroi Velev.

Më të goditur janë qytetet më të vogla - Radovishi, Koçani dhe Reseni - ku mungesa e kuadrit të specializuar mjekësor e përkeqëson gjithashtu gjendjen. Velev theksoi se mungojnë edhe infermiere për edukimin e pacientëve, gjë që është kritike për menaxhimin e duhur të sëmundjes.

Pa terapi dhe monitorim të rregullt, pacientët janë të ekspozuar ndaj rrezikut nga hipoglikemia, gangrena, verbëria dhe komplikime të tjera kronike. Një pjesë e tyre janë të detyruar të furnizojnë barna në tregun privat, gjë që për shumicën është financiarisht e paqëndrueshme.

Fondi i Sigurimeve Shëndetësore njoftoi model të ri për sigurimin e terapisë dhe pajisjeve mjekësore, me mekanizma të përmirësuara të furnizimit dhe kritere të qarta për marrjen e pajisjeve. Shoqatat e pacientëve kërkojnë zbatim urgjent të këtyre masave për të parandaluar përkeqësimin e mëtejshëm të rezultateve shëndetësore.