Maqedonia dhe Shtetet e Bashkuara të Amerikës e thellojnë partneritetin strategjik përmes formave të reja të bashkëpunimit në energjetikë, transformimin digjital dhe sigurinë, të dakorduara në Dialogun Strategjik të mbajtur në Uashington.

Një paketë milionëshe nga SHBA është dedikuar për mbrojtjen, energjetikën dhe sigurinë kibernetike. Përveç 5 milionë dollarëve tashmë të njoftuara për sigurinë kibernetike dhe 3.5 milionë për MPB-në, dialogu strategjik përfshiu edhe bashkëpunim në furnizimin me gaz natyror të lëngshëm nga SHBA.

Delegacionin e udhëhoqi ministri i Punëve të Jashtme Timço Mucunski, me pjesëmarrjen e ministrave të punëve të brendshme Pançe Toshkovski, të mbrojtjes Vllado Misajllovski, të transformimit digjital Stefan Andonovski dhe të energjetikës Sanja Bozhinovska.

Dy palët konfirmuan synimin për forcimin e bashkëpunimit në luftën kundër terrorizmit, krimit të organizuar, migracionit ilegal dhe tregtisë me drogë. Fokus i veçantë u vendos në ndërtimin e qendrës për incidente kibernetike me ndihmë teknike amerikane.

Komponenti energjetik përfshin edhe diversifikimin e burimeve të energjisë, me qëllim uljen e varësisë nga një furnizues i vetëm dhe forcimin e sigurisë energjetike të vendit.