Një dron që hyri në territorin e Lituanisë dhe shpërtheu pranë kufirit me Bjellorusinë vjen nga Ukraina, dhe jo nga Rusia siç dyshohej fillimisht, njoftoi kryeministrja Inga Ruginene.

Fluturakja ishte e lidhur me "një operacion ukrainas kundër Rusisë", gjë që e ndërlikon më tej dinamikën e sigurisë rajonale dhe hap pyetje për kontrollin e hapësirës ajrore të anëtarëve të NATO-s.

Incidenti ndodhi në rajonin e Varenës kur banorët vendas dëgjuan një fluturakë duke kaluar mbi kokat e tyre gjatë natës. Droni më pas ra në një liqen dhe shpërtheu, pa viktima të raportuara.

Sistemet e mbrojtjes kundërajrore dhe radarët nuk arritën ta zbulonin fluturakën, me shumë gjasa sepse fluturonte në përafërsisht 300 metra lartësi - mjaft ulët për t'iu shmangur sistemeve të zbulimit.

Zyrtarët në Vilnius fillimisht sugjeruan me kujdes se droni mund të vinte nga territori rus. Megjithatë, pas përfundimit të hetimit, autoritetet konfirmuan origjinën ukrainase, duke e rrëzuar vlerësimin e tyre paraprak.

Mbetet e panjohur nëse autoritetet lituaneze i kanë informuar aleatët e NATO-s për origjinën e dronit, gjë që rrit shqetësimet për implikacionet e sigurisë të këtij ngjarjeje.