Inflacioni në Shtetet e Bashkuara të Amerikës u rrit në 3,3 përqind në bazë vjetore në mars, duke shënuar normën më të lartë në pothuajse dy vitet e fundit. Në bazë mujore, çmimet u rritën për 0,9 përqind, ku goditjen më të madhe e pësoi çmimi i benzinës.

Nxitësi kryesor i rritjes inflacioniste është konflikti me Iranin dhe ndërprerjet e trafikut detar nëpër Ngushticën e Hormuzit, nëpër të cilën kalon rreth një e pesta e tregtisë globale të naftës dhe gazit natyror. Përkundër armëpushimit të njoftuar, numri i anijeve që kalojnë nëpër ngushticë mbeti drastikisht i reduktuar - vetëm 15 në vend të 138 të zakonshme.

Benzina shënoi rritje prej 21,2 përqind brenda një muaji, duke përfaqësuar rritjen më të madhe mujore që kur Byroja e Statistikave të Punës filloi ta gjurmojë këtë të dhënë në vitin 1967. Rritja e çmimeve të karburanteve po derdhet edhe në sektorë të tjerë - biletat e avionëve, veshjet dhe shpenzimet e ekonomive familjare tashmë po shënojnë rritje.

Inflacioni bazë, pa ushqim dhe energji, u rrit në mënyrë të moderuar për 0,2 përqind në bazë mujore, gjë që tregon se goditja e çmimeve ende nuk është përhapur plotësisht në shportën më të gjerë të konsumatorit. Megjithatë, analistët paralajmërojnë se nafta e shtrenjtë, transporti dhe plehrat mund të ushtrojnë shpejt presion mbi çmimet e ushqimit dhe shërbimeve.

Rezerva Federale qëndron përpara një vendimi të vështirë - nëse duhet t'i mbajë normat e larta të interesit për luftën kundër inflacionit apo të rrezikojë pakënaqësinë e konsumatorëve për shkak të çmimeve vazhdimisht të larta. Ekspertët vlerësojnë se nëse paqëndrueshmëria gjeopolitike vazhdon, trendi inflacionist mund të përkeqësohet edhe më tej.