Kryeministri Hristijan Mickoski njoftoi se nga java e ardhshme do të ketë ulje të çmimeve të karburanteve në vend. Sipas njoftimeve, nafta do të lirohet për 2,5 denarë për litër, ndërsa benzinat Eurosuper 95 dhe Eurosuper 98 do të jenë më të lira për 1,5 denarë për litër.

Njoftimi u bë në konferencë për media para Komisionit Rregullator të Energjetikës, i cili në seancën e ardhshme duhet të përcaktojë çmimet e reja me pakicë. Mickoski theksoi se shteti siguron furnizim stabil dhe të rregullt me energjentë për qytetarët.

Kryeministri vuri në dukje se Maqedonia ka ndër çmimet më të ulëta të karburanteve në rajon, arsyeja pse një numër i madh qytetarësh nga vendet fqinje vijnë të mbushin karburant në vend. Megjithatë, ai theksoi se nuk planifikohen kurrfarë kufizimesh në shitjen e derivateve të naftës, duke pasur parasysh se pikat e karburanteve furnizojnë deri në dy milionë litra karburant në ditë.

Gjithashtu, kompania shtetërore e naftës OKTA mban një zbritje prej 2 denarësh për partnerët e saj, gjë që ndikon edhe më tej në çmimet përfundimtare me pakicë.

Zëvendëskryeministri Aleksandar Nikoloski shtoi se qeveria ka ndërmarrë masa për stabilizimin e tregut që nga fillimi i krizës, duke theksuar se inflacioni në vend është i pesti më i ulët në Evropë. Ai njoftoi se të martën do të dihet nëse dhe sa kanë shtrenjtur produktet bazë ushqimore, dhe nëse konstatohet sjellje spekulative në treg, përgjegjësit do të sanksionohen.