Ministria e Punëve të Brendshme njoftoi se brenda një dite u raportuan gjashtë raste të veçanta dhune familjare në disa qytete të vendit, me pesë persona të ndalur nën dyshimin e formave të ndryshme të dhunës fizike dhe psikologjike.

Në Gostivar, policia ndaloi 27-vjeçarin J.Z. pas raportimit se kishte kërcënuar anëtarët e familjes së gruas nëpërmjet rrjeteve sociale. Në Kriva Pallankë pati dy raste: një 18-vjeçar sulmoi fizikisht babanë e tij, dhe një burrë 49-vjeçar sulmoi fëmijët e gruas. Në Manastir, një burrë 33-vjeçar u ndalua për sulm fizik ndaj gruas 25-vjeçare në shtëpinë familjare.

Në Prillep, një grua 45-vjeçare raportoi sulm fizik nga bashkëshorti. Në Ohër, policia ndaloi 44-vjeçarin O.L. pas raportimit se kishte sulmuar fizikisht partneren bashkëjetese dhe fëmijën e tyre të mitur.

MPB njoftoi se po merren masa për hetim dhe dokumentim të plotë të të gjitha rasteve, pas të cilave do të parashtrohen kallëzime penale përkatëse kundër autorëve.