Ministri i Jashtëm Timcho Mucunski mori pjesë në Budapest Balkans Forum 2026 në Hungari, duke marrë fjalën në panel-diskutimin "Evropa Qendrore dhe Ballkani Perëndimor në Epokën e Re Gjeopolitike". Krahas Mucunskit, në debat morën pjesë ministri hungarez i Punëve të Jashtme dhe Tregtisë Peter Szijjarto dhe zëvendëskryeministri i Malit të Zi për Punët e Jashtme Filip Ivanovic.

Mucunski theksoi se Maqedonia ka një shoqëri thellësisht pro-evropiane dhe se qeveria është e angazhuar ndaj reformave evropiane dhe harmonizimit të plotë me Politikën e Përbashkët të Jashtme dhe të Sigurisë së BE-së. "Detyra jonë është të jemi partner i parashikueshëm i Bashkimit Evropian, por presim të njëjtën gjë në këmbim", deklaroi ai, duke vërejtur se parashikueshmëria duhet të jetë reciproke. Në këtë kontekst, Maqedonia pret një proces të qartë, besnik dhe të parashikueshëm zgjerimi të BE-së.

Ministri nënvizoi rëndësinë strategjike të Korridoreve 8 dhe 10 për sigurinë rajonale, ekonominë dhe tregtinë dhe theksoi ndërtimin e ndërlidhësit me Greqinë që do të mundësojë aksesin ndaj gazit të lëngtë nga porti i Alexandroupolis. Ndër prioritetet e Ministrit të Jashtëm ishte edhe forcimi i partneritetit me Hungarinë, vend që Mucunski e përshkroi si "partner strategjik dhe mbështetës të rrugës evropiane të Maqedonisë".

Mucunski shtoi se në kushtet e sfidave të intensifikuara të sigurisë dhe gjeopolitikës, qeveritë duhet të përshtaten shpejt dhe të bashkëpunojnë, pasi bashkëpunimi është "opsioni i vetëm real". Vizita në Budapest është pjesë e angazhimit diplomatik të Maqedonisë në rajon në një kohë kur shembëlltyret gjeopolitike, kryesisht konflikti me Iranin dhe situata në Ukrainë, kanë rritur presionin mbi zgjerimin e BE-së.