Për shkak të festimit të Pashkëve, nga sot në orën 18:00 në Shkup hyn në fuqi një regjim i veçantë trafiku, me mbyllje të përkohshme të disa rrugëve kryesore dhe devijim të linjave të transportit publik.

Në zonën qendrore do të mbyllen për trafik: bulevardi "Partizanski Odredi" nga kryqëzimi me "Franklin Ruzvelt" deri te bulevardi "VMRO", bulevardi "Shën Kliment Ohridski" nga "Ilinden" deri te "Dimitrije Çupovski", si edhe rruga "Mitropolit Teodosij Gologanov" nga "9 Maj" deri te rrethrrotullimi te "Shën Kirili dhe Metodi".

Ndryshime do të ketë edhe në transportin publik. Autobusët që zakonisht kalojnë nëpër urën "Goce Dellçev" do të devijojnë nëpër bulevardin "Ilinden" dhe rrugën "Franklin Ruzvelt", ndërsa një pjesë e linjave qendrore do të qarkullojnë me trasa të ndryshuara nëpër "M.T. Gologanov".

Jashtë qendrës, në komunën Gjorçe Petrov do të mbyllet rruga "Makedonska Vojska" pranë kishës "Shën Pjetri dhe Pavli", ndërsa në komunën Aerodrom do të mbyllet rruga lokale drejt fshatit Lisice.

Ministria e Punëve të Brendshme informon se regjimi do të zbatohet sipas nevojës, në varësi të lëvizjes dhe grumbullimit të qytetarëve rreth objekteve fetare. Nëse ka nevojë, do të mbyllen edhe rrugë shtesë.

Policia u bën thirrje qytetarëve të respektojnë udhëzimet e personave të uniformuar dhe të planifikojnë paraprakisht rrugë alternative për lëvizje gjatë mbrëmjes festive.