Maqedonia do të marrë 5 milionë dollarë mbështetje nga Shtetet e Bashkuara të Amerikës për forcimin e sigurisë kibernetike, si pjesë e rezultateve të Dialogut Strategjik të mbajtur në Uashington.

Ministri i Punëve të Brendshme Pançe Toshkovski njoftoi se MPB do të marrë rreth 3.5 milionë dollarë nga paketa e përgjithshme, të orientuara drejt policisë kufitare, luftës kundër terrorizmit dhe krimit të organizuar ndërkombëtar. "Shtetet e Bashkuara mbeten partneri strategjik më i rëndësishëm i shtetit dhe aleati i fuqishëm në forcimin e sigurisë, stabilitetit dhe kapaciteteve demokratike", deklaroi Toshkovski.

Ministria e Transformimit Digjital, e udhëhequr nga ministri Stefan Andonovski, njoftoi se merr mbështetje serioze për ndërtimin e qendrës për incidente kibernetike, ndihmë teknike dhe modernizim të sistemeve. Mbështetja përfshin edhe ndihmë eksperte nga specialistë amerikanë.

Delegacionin e Dialogut Strategjik e udhëhoqi ministri i Punëve të Jashtme Timço Mucunski, ndërsa në të morën pjesë edhe ministri i Mbrojtjes Vllado Misajllovski dhe ministrja e Energjetikës Sanja Bozhinovska.

Fondet do të orientohen drejt disa fushave: forcimi i sigurisë kufitare, lufta kundër migracionit ilegal, parandalimi i tregtisë me drogë, përmirësimi i bashkëpunimit zbulues dhe përmirësimi i sigurisë kibernetike përmes mbështetjes teknike dhe modernizimit të sistemeve.