Presidenti i Serbisë, Aleksandar Vuçiq, bisedoi një orë në telefon me Vladimir Putinin. Zyrtarisht - për energjetikën, Industrinë e Naftës së Serbisë (NIS) dhe luftën në Ukrainë. Jozyrtarisht, ishte bisedë lamtumire: Vuçiq konfirmoi se i kishte thënë presidentit rus që të dielën, më 27 shtator, rreth orës 20, jep dorëheqje.

Tema kryesore ishte gazi. Aneksi i marrëveshjes për gazin rus skadon më 30 shtator, ndërsa Vuçiq pas bisedës deklaroi se është i bindur që aranzhimi do të vazhdohet „që nga e hëna“, dhe atë me çmim të pandryshuar. Shifrat i tha vetë: Serbia paguan rreth 318 euro për 1.000 metra kub, ndërsa çmimi i tregut aktualisht është 868 euro. Me fjalë të tjera - më pak se gjysma.

Kjo është valuta me të cilën Beogradi paguan „ekuilibrin“ e tij të famshëm mes Lindjes dhe Perëndimit. Për aranzhimin e ri Vuçiq së fundmi kishte biseduar edhe me ministrin rus të Punëve të Jashtme Sergej Lavrov në Nju Jork, kur paralajmëroi se marrëveshje e re do të ketë deri në fund të shtatorit. Tani e paralajmëron në Instagram, me një video-mesazh.

Tema më e vështirë ishte NIS-i. „Folëm edhe për Industrinë e Naftës së Serbisë, ku problemi është më i ndërlikuar, por shkëmbyem mendime“, tha Vuçiq. E përkthyer nga diplomatikja në gjuhë të zakonshme: zgjidhje ende nuk ka. Mbeti vetëm shpresa për një përfundim „që është i mirë për të dyja palët“.

Në bisedë u përmend edhe pjesëmarrja e Hekurudhave Ruse në projekte në Serbi, ndërsa Vuçiq e falënderoi Putinin për ndihmën në shuarjen e zjarreve - avioni rus „Iljushin“ dhe ekuipazhi, siç tha ai, „bënë punë të madhe“.

Pastaj pasoi fjalia që tingëllon si mesazh për pasardhësin: „Shpresoj se edhe presidentët e ardhshëm të Serbisë do të dinë ta udhëheqin me përgjegjësi politikën e jashtme të vendit tonë dhe të ruajnë ekuilibrin ndaj të gjithë aktorëve në skenën ndërkombëtare.“ Vuçiq me Putinin, sipas fjalëve të tij, komunikon më shumë se 14 vjet, dhe largohet me falënderim për Federatën Ruse për bashkëpunimin në atë periudhë.

Kushdo që të vijë pas tij, trashëgon gaz me një çmim që varet nga një linjë telefonike me Moskën. A është ky ekuilibër apo varësi? Dhe kush do të mund ta mbajë atë ekuilibër pa njeriun që e ndërtoi me vite - bisedë pas bisede?