Qytetarët paguan rreth 3 milionë euro më shumë për shkak të shtrenjtimit të naftës, ndërsa Qeveria tërë javën nuk ndërmori asnjë masë për çmimet e karburanteve, reagoi LSDM.

Opozita pretendon se shtrenjtimi tashmë ka pasoja të drejtpërdrejta në çmimet e produkteve bazë, duke përmëndur si shembull se çmimi i vajit të gatimit e kalon 100 denarë.

LSDM më parë propozoi paketë masash duke përfshirë uljen e TVSH-së në karburante nga 18% në 5%, uljen e akcizës për katër denarë dhe uljen e TVSH-së në produkte ushqimore bazë.

Ndërkohë, Komisioni Rregullator i Energjetikës (KRRE) do të mblidhet të hënën për të vendosur çmime të reja të karburanteve. Çmimet aktuale nga 10 marsi janë 79,5 denarë për litër Eurosuper BS-95, 81,5 për BS-98, 85,5 për eurodizel dhe 82,5 për vaj ekstra të lehtë për amvisëri.

Çmimet globale të naftës vazhdojnë të rriten, me naftën e papërpunuar që kohët e fundit e kaloi nivelin e 100 dollarëve për fuçi. Konflikti në Lindjen e Mesme dhe çrregullimet rreth Ngushticës së Hormuzit i kufizojnë mundësitë për ulje të konsiderueshme të çmimeve vendase.