Një javë pas emërimit të Mojtaba Hameneijt si lider i ri suprem i Iranit, publiku ende nuk e ka parë. Analistët thonë se shfaqja e tij publike ndoshta nuk është vendimtare - ajo që ka rëndësi është nëse institucionet nën të funksionojnë siç duhet.

Rol kyç në këtë periudhë luan Garda Revolucionare Islamike e Iranit (IRGC), degë elitare e forcave të armatosura iraniane e formuar pas Revolucionit Islamik të vitit 1979. Analistët besojnë se Garda mund ta udhëheqë strategjinë ushtarake të vendit pavarësisht nga prezenca fizike e liderit.

IRGC ka ndikim të fuqishëm në aparatin e sigurisë dhe ka ndërtuar një perandori masive biznesi me interesa në ndërtimtari, telekomunikacion, industrinë e automobilave dhe energjetikë. Komandanti i Gardës i përgjigjet drejtpërdrejt liderit suprem.

Në vitin 2019, administrata e Trampit e caktoi IRGC-në si organizatë terroriste. Bahreini dhe Arabia Saudite e shtuan në listat e tyre në 2018, ndërsa Bashkimi Evropian e bëri këtë sivjet për shkak të shtypjes së dhunshme të protestave kundër qeverisë.