Një këngëtar që nisi në një konvikt studentor në Zagreb, ndërsa sot është një nga zërat më të dallueshëm të këngës dalmate, vjen për herë të parë në Shkup. Marko Shkugor performon në sallën e Filarmonisë së Maqedonisë më 17 tetor me fillim në orën 20:00, në një koncert të paralajmëruar nën titullin „Tingulli i Mesdheut”.

Shkugori ka lindur në Shibenik në vitin 1989 dhe nga profesioni është magjistër i ekonomisë. Gjatë studimeve në Zagreb këndoi në një klapë studentore, ndërsa më vonë kaloi nëpër klapat Kampanel dhe Maslina. Në vitin 2013 u bë tenori i parë i „Klapa s mora”, formacionit që përfaqësoi Kroacinë në Eurovizion me këngën „Mizherja”. Në të njëjtën periudhë merrte orë kënge te tenori Stojan Stojanov Gançev, ish-solisti kryesor i operas së Zagrebit, i cili i parashikonte karrierë operistike. Ai zgjodhi këngën dalmate.

Depërtimin si solist e bëri në Festivalin e Splitit në vitin 2014, ku me „Devet slova jedne riçi” fitoi çmimin Grand Prix. Dy vjet më vonë mbajti turneun „Zvuci Mediterana” me mbi 40 koncerte dhe mori çmimin e publikut në Mbrëmjet e shansonit dalmat me „Samo ti si”. Mes bashkëpunimeve që mbahen mend më shumë është dueti „Samo s tobom sam upoznao ljubav” me Oliver Dragojeviqin, ndërsa me Danijella Martinoviqin regjistroi „Ono neshto”.

Repertori për mbrëmjen shkupjane shkon drejt baladave dhe hiteve të njohura, ndërsa zgjedhja e sallës nuk është e rastësishme: filarmonia është një hapësirë akustike në të cilën një zë i tillë dëgjohet pa ndihmën e ozvuçimit që kërkojnë arenat. Biletat lëvizin nga 1.600 deri në 2.200 denarë dhe shiten përmes mktickets.mk dhe karti.com.mk.