Kroacia do të vazhdojë ta mbështesë Maqedoninë në rrugën drejt anëtarësimit në Bashkimin Evropian, deklaroi kryeministri kroat Andrej Plenkoviq pas takimit me kryeministrin Hristijan Mickoski në Bruksel.

"Jam i kënaqur që u takova me kryeministrin e Maqedonisë së Veriut në Bruksel. Kroacia do të vazhdojë ta mbështesë Maqedoninë e Veriut në rrugën e saj drejt BE-së", shkroi Plenkoviq në profilin e tij në X.

Takimi u mbajt në margjinat e festimit të 50-vjetorit të themelimit të Partisë Popullore Evropiane, ku do të mbahet edhe samiti i liderëve. Mickoski është në Bruksel me delegacionin e VMRO-DPMNE-së deri më 20 mars.

Në takim u shkëmbyen mendime për ngjarjet aktuale globale, sfidat gjeopolitike, sigurinë e furnizimit me energji në Evropën Juglindore dhe masat e dy qeverive për përballimin e çmimeve në rritje të energjisë.

Mickoski theksoi se bisedimet përfshinë "sfidat aktuale evropiane, bashkëpunimin rajonal dhe perspektivën evropiane" me theks në forcimin e marrëdhënieve dypalëshe.