Administrata e Trampit u urdhëroi diplomatëve amerikanë në mbarë botën t'u bëjnë thirrje aleatëve që të shpallin Gardën Revolucionare Iraniane dhe Hezbollahun si organizata terroriste. Sekretari i shtetit Marko Rubio lëshoi direktivën më 16 mars, dërguar në të gjitha përfaqësitë diplomatike dhe konsullore amerikane.

Diplomatët morën afat deri më 20 mars për të përcjellë mesazhin te kolegët "në nivelin më të lartë të përshtatshëm", ndërsa përpjekjet duhet të koordinohen me partnerët izraelitë.

Administrata përpiqet të mobilizojë aleatët hezitues - shumë prej të cilëve nuk ishin njoftuar paraprakisht për fushatën ajrore të SHBA-së dhe Izraelit para dy javësh - që të mbështesin operacionet ushtarake.

Shumë aleatë amerikanë ditën e hënë njoftuan se nuk kanë ndërmend të vendosin anije për të ndihmuar forcat amerikane në debllokimin e Ngushticës së Hormuzit, duke refuzuar kërkesën e Trampit.

Në direktivë thuhet: "Me rrezikun e rritur nga Irani dhe grupet terroriste të lidhura me të, të gjitha qeveritë duhet të veprojnë shpejt për të zvogëluar kapacitetin e Iranit për të sulmuar kombet dhe qytetarët tanë."