Presidenti amerikan Donald Tramp deklaroi se pret ta ketë "nderin ta marrë Kubën", ndërsa shteti ishullor përballet me mungesë të energjisë elektrike të shkaktuar nga bllokada amerikane e naftës.

"Dëgjoj për SHBA-në dhe Kubën gjithë jetën. Kur do të bëjnë Shtetet e Bashkuara diçka? Besoj se unë do ta kem nderin ta marr Kubën. Nëse do ta çliroj apo do ta marr, mendoj se mund të bëj çfarë dua me të. Ata momentalisht janë komb shumë i dobësuar", deklaroi Trampi.

Shkurt pas deklaratës së tij, sipas katër burimeve, funksionarë amerikanë i kërkuan Kubës të largojë presidentin Migel Diaz-Kanel gjatë negociatave të fundit.

SHBA-ja po rrit presionin ndaj Kubës pas largimit në janar të presidentit venezuelian Maduro, i cili ishte aleati më i rëndësishëm i Havanës. Trampi ndërpreu dërgesat venezueliane të naftës për Kubën dhe kërcënoi me tarifa çdo vend që do t'i shiste naftë.

Sekretari i shtetit Marko Rubio, prindërit e të cilit janë emigrantë kubanë, prej kohësh është eksplicit për dëshirën për ndryshim të regjimit në Havanë. Trampi paraprakisht bënte thirrje për "marrje miqësore", por kohët e fundit deklaroi: "Ndoshta nuk do të jetë marrje miqësore."