Edhe përkundër faktit se ishte paralajmëruar paraprakisht për përgjigjen e mundshme iraniane, presidenti amerikan Donald Tramp pretendon se sulmet e Teheranit ishin plotësisht të papritura. Sipas burimeve amerikane të zbulimit, hakmarrja iraniane ishte vlerësuar si e mundshme, edhe pse jo e garantuar.

Trampi dy herë përsëriti se sulmet iraniane ndaj Katarit, Arabisë Saudite, EBA-së, Bahreinit dhe Kuvajtit ishin befasi. "Nuk duhej t'i sulmonin të gjitha ato vende të Lindjes së Mesme. Askush nuk e priste këtë. Ishim të tronditur", deklaroi ai në një takim në Shtëpinë e Bardhë.

Dy burime tregojnë se Trampi ishte informuar paraprakisht se Teherani me shumë gjasa do të përpiqej të mbyllte Ngushticën strategjikisht jetike të Hormuzit.

Sipas një funksionari amerikan, Trampi ishte njoftuar se sulmi ndaj Iranit mund të provokonte konflikt më të gjerë rajonal, përfshirë sulme iraniane ndaj kryeqyteteve të vendeve të Gjirit - veçanërisht nëse Teherani besonte se ato kombe e mbështesin ose marrin pjesë aktivisht në operacionet amerikane.

Komuniteti i zbulimit gjithashtu kishte paralajmëruar se Irani mund ta zgjeronte hakmarrjen edhe ndaj aleatëve rajonalë amerikanë. Evakuimi i personelit diplomatik nga disa ambasada në rajon u urdhërua vetëm pasi filluan operacionet ajrore.