Guvernatori i Kalifornisë, Gevin Njusom, nuk e nënshkroi ligjin që duhej ta ndalonte xhirimin e fshehtë të njerëzve me pajisje që mbahen në trup. Propozimin SB 1130, tashmë të votuar në organin ligjvënës të shtetit, e ktheu mbrapsht me arsyetimin se pajisjet për xhirim i përkufizon „shumë gjerë ose pa saktësi“, gjë që mund të çonte në konfuzion dhe pasoja të padëshiruara. Njusom shtoi gjithashtu se një pjesë e mbrojtjeve që ofron propozimi ekzistojnë tashmë në të drejtën kaliforniane.

Nëse ligji do të kalonte, Kalifornia do të bëhej shteti i parë amerikan që i rregullon syzet inteligjente. Shkelësit do të mund të merrnin gjobë ose burg, ndërsa dënime do të paguanin edhe prodhuesit e pajisjeve që nuk i respektojnë rregullat. Në të njëjtën kohë, vende si Norvegjia po mendojnë nëse ta ndalojnë fare teknologjinë.

Qëllimi ishte që njerëzit të mos xhirohen në vende publike pa pëlqimin e tyre të shprehur. Problemi nuk është teorik: Meta vetëm vitin e kaluar shiti mbi 7 milionë syze inteligjente, ndërsa syze të ngjashme me kamera dhe mikrofona prodhon edhe Snap. Në treg u shfaqën edhe varëse me inteligjencë artificiale që dëgjojnë gjithçka përreth. Kritikët dhe vetë përdoruesit tashmë u kanë gjetur nofkë - „syze perverse“, pas disa denoncimeve për njerëz që me to kanë xhiruar dhe keqtrajtuar të tjerët.

Autorja e ligjit, senatorja Eloiz Gomez Rejes, pohonte se Kalifornia duhet të reagojë ndaj vërshimit të shpejtë të teknologjisë që dëgjon vazhdimisht. Në vend të kësaj, shteti ku kanë selinë Meta, Apple dhe Google vendosi se përkufizimet nuk janë mjaft të sakta. Ndoshta edhe nuk janë. Por industria lëviz shumë më shpejt se ligjvënësi: Apple muajin e kaluar paralajmëroi se softueri i ri për Apple Watch do të ketë funksion që dëgjon vazhdimisht, do të mund t'i shfaqë 15 sekondat e fundit të bisedës si transkript dhe t'i përmbledhë bisedat e gjithë ditës.

Kur syzet të bëhen të zakonshme sa telefoni, pyetja do të arrijë edhe në kafenetë tona: si do ta dish nëse ai në tavolinën fqinje vetëm po pi kafe apo po të xhiron? Dhe sa vonë do të vijë ligji kur të vijë radha te ne?