Presidenti serb Aleksandar Vuçiq në fjalimin përkujtimor në Vranje me rastin e 27-vjetorit të bombardimeve të NATO-s në vitin 1999 deklaroi se "nëse vjen deri te shkatërrimi i botës, nuk do të ketë dyshim se fundi filloi më 24 mars 1999".

Vuçiq përsëriti se çdo konflikt që sot zhvillohet në botë nuk ka filluar dje, por më 24 mars 1999, kur NATO e nisi fushatën ushtarake kundër Serbisë.

Përkujtimi u mbajt në ditën kur Serbia tradicionalisht kujton viktimat e fushatës 78-ditore të bombardimit, në të cilën humbën jetën qindra civilë dhe u shkatërrua infrastrukturë e konsiderueshme nëpër vend.

Fjalimi i Vuçiqit vjen në periudhë tensionesh të përshkallëzuara globale, me konflikte aktive në disa fronte - nga lufta në Ukrainë deri te përshkallëzimi mes SHBA-së, Izraelit dhe Iranit.