Zoran Ilijoski, nxënës 14-vjeçar nga Kërçova, fitoi medaljen e bronztë në Olimpiadën e 19-të Ballkanike të Informatikës për të Rinj, e cila u mbajt nga 22 deri më 28 shtator në Sarajevë. Në konkurrencë ishin 55 garues nga 13 vende: dhjetë anëtare dhe tri të ftuara, Arabia Saudite, Ukraina dhe Mbretëria e Bashkuar. Gara është për nxënës deri në 15,5 vjeç.

Për Ilijoskin kjo është medalja e tretë ndërkombëtare këtë vit. Më parë fitoi bronz në Olimpiadën Ballkanike të Matematikës për të Rinj në Buzău të Rumanisë dhe bronz në Olimpiadën Evropiane të Informatikës për të Rinj në Kaunas të Lituanisë. Medaljet i vijnë edhe nga matematika, edhe nga informatika.

Në ekipin maqedonas ishin edhe Jakov Grujovski dhe Ian Stevkov nga Shkupi dhe Panče Banskoliev nga Strumica, i cili fitoi lëvdatë olimpike. Ekipin e udhëhoqën Blagojče Pavleski dhe Petar Kovačovski, studentë të Fakultetit të Shkencave Informatike dhe Inxhinierisë Kompjuterike (FINKI), ndërsa në delegacion ishte edhe prof. dr. Mile Jovanov nga FINKI, kryetar i iniciativës BOI.

Me këtë rezultat, bilanci i nxënësve maqedonas në olimpiadat ndërkombëtare ku ka marrë pjesë këtë vit Shoqata e Informatikanëve të Maqedonisë është dy medalje argjendi dhe dhjetë bronzi dhe katër lëvdata olimpike. Ekipi olimpik zgjidhet përmes një cikli garash gjatë gjithë vitit që Shoqata e organizon prej 37 vjetësh, me mbështetjen e FINKI-t dhe disa kompanive.

Një krahasim vlen të shënohet. Në Bosnjë e Hercegovinë olimpiada u mbajt nën patronazhin e përgjithshëm financiar të shtetit. Te ne ciklin që i zbulon këta fëmijë Shoqata e organizon me mbështetjen e një fakulteti dhe disa kompanive. Sa nga medaljet janë meritë e shtetit dhe sa e entuziastëve? Olimpiada e ardhshme, e 20-ta, është vitin që vjen në Greqi.