Banesa 42 metra katrorë për shumë familje është gjithë shtëpia, jo shtëpi pushimi. Prandaj ia vlen të shihet si studioja ERA Studio e rregulloi pikërisht një banesë të tillë, të dedikuar për pushime, që të duket më e madhe se sa është - pa mrekulli, pa truke të shtrenjta, vetëm me dritë, rregull dhe vazhdimësi. Pesë vendime e mbajnë gjithë projektin, dhe asnjëri nuk kërkon më shumë metra katrorë.

Shikimi duhet të arrijë larg

Rregullimi i vjetër ishte klasik: korridor, pastaj kuzhinë e mbyllur, pastaj dhomë ndenjjeje, secila në kutinë e vet. I riu i lidh në një hapësirë të vazhdueshme. „Pamjet e gjata krijojnë hapësirë dhe qetësi“, thonë nga studioja, dhe i mundësojnë dritës natyrore të depërtojë thellë brenda. Në një banesë të vogël, ky është dallimi mes „ngushtë“ dhe „e vogël, por e këndshme“.

Hapje - por vetëm kur ndihmon vërtet

Dizajnerët nuk e shesin hapësirën e hapur si fe. Kur rrëzon një mur, humb edhe sipërfaqe për dollapë. Këtu llogaria doli pozitive: bashkimi i kuzhinës, dhomës së ngrënies dhe asaj të ndenjjes i ndriçoi zonat e errëta. Në një banesë tjetër, i njëjti vendim mund të ishte gabim.

Mos e mbushni me mobilie

Pas kanapesë muri është veshur me tapet prej jute, ndërsa poshtë qëndron një arkë për ruajtje, e punuar me porosi. „Investimi në mobilie me porosi është veçanërisht i rëndësishëm kur metrat katrorë janë pak“, thonë nga ERA Studio. Përparësitë: dollapët, kuzhina dhe muret e pajisura. Kolltuku që „do ta vendosim diku“ është pikërisht ajo që banesa e vogël nuk mund ta përballojë.

Më pak ngacmime, më shumë ajër

Paleta është qëllimisht e përmbajtur: dru i çelët, tone neutrale të ngrohta dhe fibra natyrore. I vetmi theks ngjyre është kanapeja e gjelbër. „Ideale do të ishte të zgjidhen një ose dy pika vëmendjeje“, këshillojnë dizajnerët - çdo gjë më shumë e lodh syrin dhe e zvogëlon hapësirën.

Kufi pa mur

Mes kuzhinës dhe dhomës së ngrënies nuk ka mur, por ndarëse prej listelash druri të punuar me porosi. Ajo e shënon kalimin mes dy zonave, pa e bllokuar dritën. Studioja kërkon „zgjidhje që i lejojnë dritës të arrijë deri te zonat e brendshme pa humbur privatësia“.

Kuzhinë e vogël, plotësisht e pajisur

Kuzhina është ndarë në dy fronte funksionale. Në njërin janë lavamani, makina e enëve dhe pllaka e gatimit. Në tjetrin - frigoriferi, furra, mikrovala dhe makina larëse. Mobiliet janë nga Santos Bilbao, prej druri dhe pllakash porcelani me pamje guri. Poenta e dizajnerëve: në kuzhinë të vogël, shpërndarja e saktë është më e rëndësishme se metrazhi.

Materialet e njëjta „shtojnë“ metra katrorë

Dhoma kryesore e gjumit vazhdon me tonet e ngrohta, drurin dhe tekstilin. Dy tapete, bezhë dhe jeshil kaki, krijojnë një kokë shtrati që e mbështjell krevatin. „Kur përdoret e njëjta fije materialesh, hapësira ndihet si një tërësi“, shpjegojnë nga studioja. Kur secila dhomë flet gjuhën e vet, banesa copëtohet në pjesë edhe më të vogla.

Dollap nga muri në mur

Në dhomën e gjumit dollapi zë një mur të tërë dhe e mbledh gati gjithë hapësirën e ruajtjes në një vend. Sipas dizajnerëve, dollapët duhet të kalojnë pa u vënë re, të integruar në mure - ndërsa nën krevat ka edhe një arkë tjetër për ruajtje.

Mobilie për qoshet e vështira

Në dhomën e dytë të gjumit, nën dritare qëndron një tavolinë pune me hapësirë të integruar ruajtjeje, ndërsa krevati sërish ka arkë. Ideja është të gjenden „metra katrorë aty ku në dukje nuk ka“ - nën krevatë, pranë shtyllave, në qoshet që zakonisht mbeten bosh.

Banjoja: vazhdimësi dhe pak elemente

Edhe në banjon e vogël vlen e njëjta gjë: paletë e çelët, pasqyrë e madhe dhe sipërfaqe të pandërprera. Studioja propozon që materialet nga dhomat e tjera të vazhdojnë edhe në banjo, që të mos ndërpritet fija vizuale.

Çfarë funksionon vërtet

Kur mblidhen të gjitha zgjidhjet, mbeten pesë rregulla: maksimum dritë natyrore dhe pamje të gjata; hapje vetëm kur rregullimi vërtet përmirësohet, pa humbur hapësirë ruajtjeje; mobilie me porosi për dollapët, kuzhinën dhe muret; më pak zhurmë vizuale, me ruajtjen të mbledhur në një vend dhe vetëm një ose dy theksa; dhe e njëjta fije ngjyrash dhe materialesh nëpër gjithë banesën. Sa prej nesh do të jepnin para për edhe një dhomë - kur problemi, në fakt, ndoshta është kolltuku nga i cili askush nuk heq dorë?