Ajri në Shkup përkeqësohet para sezonit të ngrohjes: Grimcat PM10 në Gazi Babë dyfish më të larta brenda një jave

Sezoni i ngrohjes ende nuk ka nisur siç duhet, e ajri i Shkupit tashmë po përkeqësohet. Të dhënat nga stacionet matëse tregojnë rritje të vazhdueshme të grimcave të dëmshme që nga 1 tetori - në disa pjesë të qytetit përqendrimet e PM10 janë pothuajse dyfish më të larta se në fillim të muajit.

Në Gazi Babë vlera mesatare ditore e PM10 u hodh nga 18,4 në 37,7 mikrogramë për metër kub. Në Karposh mesatarja ditore nga rreth 32 u ngjit mbi 50 mikrogramë, kurse në Miladinovc nga 11,5 në 31,3. Ngjashëm është edhe në Qendër dhe në Lisiçe.

Rektorati - 130 mikrogramë brenda një ore

Përqendrimin më të lartë për një orë më 7 tetor e mati stacioni Rektorat - 130,07 mikrogramë PM10 për metër kub. Maksimumet në pikat e tjera ishin 85,1 në Karposh, 69,3 në Qendër, 68,8 në Lisiçe dhe 61 në Gazi Babë. Te grimcat më të imëta dhe më të rrezikshme PM2,5, vlerat më të larta u matën në Gazi Babë, 49,2, dhe në Karposh, 40,2 mikrogramë për metër kub.

Platforma IQAir e tregonte Shkupin kryesisht në zonën mesatarisht të ndotur. Indekset lokale më të larta ishin rreth Zhelezarës - 124, pastaj Karposhi dhe Vlaja me 97 dhe 94, si dhe Miçurini me 86. Vlera më të mira kishin vetëm një pjesë e pikave në Gazi Babë dhe në Lisiçen e Re.

Më herët, në një mbrëmje, stacioni matës në Lisiçe në orën 19 regjistroi 116,18 mikrogramë PM10 - më shumë se dyfishi i kufirit të lejuar ditor prej 50. Vlerat e PM2,5 në Karposh dhe Gazi Babë atë mbrëmje ishin mbi pragun 24-orësh të rekomanduar nga Organizata Botërore e Shëndetësisë prej 15 mikrogramësh. Regjistri shtetëror atëherë e shënoi ajrin në Qendër me kategorinë më të keqe, „shumë keq“, ndërsa stacioni në Gjorçe Petrov nuk jepte fare të dhëna.

Temperaturat po bien, e lugina e Shkupit tashmë po e mbyll brenda tymin nga trafiku dhe nga ngrohja e parë e shtëpive. Këtë skenar shkupjanët e dinë përmendsh - vetëm se ende nuk është dimër. Nëse ajri është kështu në javën e parë të tetorit, me çfarë do të hyjë qyteti në nëntor dhe dhjetor?