Skip to content

Hakerët nxorën shifrat që Moska i fsheh: mbi 450.000 rusë të vrarë në Ukrainë, lufta shkaku i katërt i vdekjes në Rusi

1 min. lexim
Shpërndaj
Hakerët nxorën shifrat që Moska i fsheh: mbi 450.000 rusë të vrarë në Ukrainë, lufta shkaku i katërt i vdekjes në Rusi

Moska nuk ka publikuar shifra zyrtare për të vrarët në front që nga shtatori i vitit 2022, dhe çdo vlerësim të pavarur e hedh poshtë si të pabesueshëm. Tani shifra doli nga institucioni i saj. Sipas të dhënave që rrodhën nga agjencia shtetërore ruse e statistikës Rosstat, në luftën në Ukrainë kanë vdekur mbi 450.000 rusë. Me këtë lufta, që nga viti 2022, është bërë shkaku i katërt më i shpeshtë i vdekjes në Rusi.

Të dhënat nuk i publikoi Kremlini, por hakerët. Nga 29 tetori deri më 1 nëntor Rosstat ishte shënjestër e një sulmi kibernetik nga grupet Partizanët Kibernetikë Bjellorusë dhe Silent Crow, të cilat në Rusi janë të ndaluara si „organizata ekstremiste“. Ata lanë mesazhe në faqen kryesore të agjencisë dhe morën të dhëna për ekonominë, demografinë dhe humbjet ushtarake. „Ky është deri tani rrjedhja më e rëndësishme e të dhënave për viktimat ruse“, deklaroi Janis Kluge, udhëheqës i departamentit për Rusinë dhe Euroazinë në Institutin Gjerman për Çështje Ndërkombëtare dhe të Sigurisë.

Shifra prej 450.000, e llogaritur nga Silent Crow, përfshin edhe civilët e vrarë në sulme ajrore dhe në hyrjen ukrainase në rajonin e Kurskut në vitin 2024. Partizanët Kibernetikë Bjellorusë, me metodologji tjetër, numërojnë 393.881 të vrarë. Asnjë shifër nuk i përfshin të zhdukurit, as rreth 27.000 luftëtarët e huaj të rekrutuar në ushtrinë ruse. Një verifikim i pavarur i 50 emrave të zgjedhur rastësisht nga baza nuk mundi ta konfirmojë plotësisht gjithë grupin, por shifrat përputhen me vlerësime të tjera: Ministria britanike e Mbrojtjes në shtator njoftoi se mbi gjysmë milioni njerëz kanë vdekur duke luftuar për Rusinë.

Detajet janë edhe më të rënda se shuma. Për krahasim, Bashkimi Sovjetik në luftën nëntëvjeçare në Afganistan humbi rreth 13.000 ushtarë. Në Ukrainë, për çdo kilometër territori të pushtuar vdiqën 6,2 rusë. Në 14.160 raste vdekja nuk ka ardhur nga luftimi, por nga sëmundja, aksidenti trafiku ose vetëvrasja, ndërsa mbi 32.000 njerëz vdiqën nga plagë të marra të paktën një vit më parë. Plot 72 për qind e rasteve të vdekjes janë në të ashtuquajturën Republikë Popullore të Donjeckut, ku vetëm në betejën dhjetëmujore për Bahmutin vdiqën mbi 20.000 ushtarë rusë.

Çmimin nuk e paguajnë të gjithë njësoj. Republikat etnike të Rusisë janë goditur në mënyrë joproporcionale nga mobilizimi, ndërsa Moska dhe qytetet e mëdha kanë pjesë më të vogël në viktima sesa do t'i përgjigjej popullsisë së tyre. Studiuesja Maria Vyushkova politikën e rekrutimit te grupet më të vogla etnike e quan „shfarosje të popujve të tërë“. Burrat i tërheqin paga që rajonet e tyre nuk i ofrojnë, kompensime për familjet në rast vdekjeje, e disa edhe dalja nga burgu.

Kluge mendon se ndikimi ekonomik është i vogël, sepse bëhet fjalë për rreth gjysmë përqindje të popullsisë në moshë pune. Por ai politik është i madh: „Nuk mund të thuhet se Rusia po fiton nëse po humbet popullsi me këtë ritëm.“ Ballkani e di mirë sa gjatë një shtet mund ta fshehë numrin e vërtetë të të vdekurve të vet. Sa vjet do të duhej të pritej për këtë shifër, po të mos ishin hakerët?