Skip to content

DAP kërkon tatimin për të ardhurat nga jashtë pesë vjet prapa: Pse kontrollet nisën vetëm tani?

1 min. lexim
Shpërndaj
DAP kërkon tatimin për të ardhurat nga jashtë pesë vjet prapa: Pse kontrollet nisën vetëm tani?

Drejtoria e të Ardhurave Publike i kontrollon paratë që qytetarët i kanë marrë nga jashtë dhe kërkon tatim për pesë vjet prapa. Ministrja e Financave Gordana Dimitrieska-Koçoska në Kuvend deklaroi se kjo nuk është tatim retroaktiv, por ligj që ka vlejtur gjithmonë. Mirë. Atëherë mbetet pyetja më e rëndësishme: pse askush nuk e ka zbatuar deri tani?

Temën e hapi deputetja Rina Ajdari nga Fronti Evropian, e cila pohoi se DAP „në mënyrë retroaktive“ paraqet fletëparaqitje tatimore për njerëz që kanë punuar jashtë dhe se më të prekurit janë qytetarët nga Rajoni i Pollogut dhe i Kumanovës. Ministrja e hodhi poshtë interpretimin etnik dhe theksoi se të parët reaguan maqedonas nga Kumanova që kishin punuar në Afganistan. „Tatimi nuk njeh maqedonas, shqiptarë, turq, serbë, vllehë“, tha ajo.

Çfarë thotë në të vërtetë ligji

Ligji për procedurë tatimore, në nenin 110, parasheh afat parashkrimi pesëvjeçar për përcaktimin e tatimit, i cili fillon të rrjedhë pas përfundimit të vitit në të cilin janë realizuar të ardhurat. Në rast të evazionit tatimor afati është dhjetë vjet. DAP që në tetor njoftoi se po kontrollon të dhëna nga bankat për hyrje nga jashtë në vitin 2021 dhe se ka dërguar njoftime të personalizuara te një pjesë e qytetarëve.

E rëndësishme për këdo që ka marrë një shkresë të tillë: jo çdo hyrje nga jashtë është e ardhur e tatueshme. Sipas DAP-it, dhurata, mbështetja familjare, huaja apo një transfer i zakonshëm parash nuk janë automatikisht të ardhura të tatueshme. Tatim paguhet për rrogë, honorare, punë frilens, qira, dividendë, interesa e të ngjashme. Gjithçka varet nga baza mbi të cilën janë pranuar paratë dhe nga dokumentet me të cilat kjo mund të dëshmohet.

„Ka shumë gjasa“ si përgjigje

Fjalia më interesante nga seanca është ajo që kaloi më pa zhurmë. Në pyetjen pse kontrollet fillojnë vetëm tani, ministrja u përgjigj: „Fakti që më parë nuk janë bërë kontrolle, e tani bëhen, ka shumë gjasa të jetë vendim i njerëzve që kanë punuar në drejtoritë rajonale.“

Ka shumë gjasa. Ministrja e Financave nuk e di me siguri pse administrata e saj tatimore më parë nuk kontrollonte nëse paguhet tatim për të ardhurat nga jashtë. Detyrimi ekzistonte, thonë të gjithë. Kontrolli nuk ekzistonte. Tani fatura u vjen qytetarëve, ndërsa për atë se kush vendosi të mos kontrollohet deri tani nuk përgjigjet askush.

A do të shpjegojë dikush në DAP pse kontrollet nuk nisën më herët, ndërsa afati pesëvjeçar ende i mbulonte edhe vitet më të vjetra?