Gruri në tregun botëror në shtator u shtrenjtua për 6,3 përqind krahasuar me gushtin dhe arriti nivelin më të lartë që nga gushti i vitit 2023, tregon raporti më i ri i Organizatës së OKB-së për Ushqim dhe Bujqësi (FAO). Sheqeri u shtrenjtua për 6,1 përqind, misri për 5,6 përqind, orizi për 1,4, ndërsa vajrat bimore për 0,9 përqind.

I gjithë indeksi i çmimeve të ushqimit i FAO-s në shtator ishte 136 pikë - 1,5 përqind më shumë se në gusht dhe 5,8 përqind më shumë se para një viti. Ushqimi në tregjet botërore është më i shtrenjti që nga nëntori i vitit 2022.

Pse shtrenjtohet

Shkaqet janë të largëta, por të njohura: probleme logjistike në rajonin e Detit të Zi, mot i thatë në pjesë të Amerikës së Veriut para mbjelljes dhe pasiguri rreth transportit nëpër Ngushticën e Hormuzit. „Nëse vazhdojnë, këto presione së shpejti do të përcillen te çmimet e ushqimit për konsum të gjerë, veçanërisht në vendet që varen nga importi i ushqimit dhe energjisë“, paralajmëron ekonomisti kryesor i FAO-s, Maksimo Torero.

Mishi u lirua për 1,1 përqind, ndërsa produktet e qumështit mbetën pothuajse të pandryshuara. Nga ana tjetër, FAO parashikon që tregtia botërore me drithëra këtë vit të bjerë për 3,5 përqind, në 505,8 milionë tonë.

Po buka?

Për momentin nuk ka paralajmërim të konfirmuar për shtrenjtim të përgjithshëm nga prodhuesit vendas. Furrtarët thonë se rezervat e blera me çmime më të ulëta i ndihmojnë t'i zbusin shpenzimet, por një pjesë e tyre që në verë paralajmëruan se gjithnjë e më vështirë i mbajnë çmimet ekzistuese. Rritja prej 6,3 përqind në bursë nuk do të thotë automatikisht rritje e njëjtë e bukës në dyqan - çmimi përfundimtar varet nga kontratat, rezervat dhe shpenzimet e tjera.

Por rezervat nuk janë të pafundme, dhe vetë FAO thotë se goditjen më fort do ta ndiejnë vendet që importojnë ushqim dhe energji. A po llogarit dikush në Qeveri se çfarë do të thotë kjo për ne, apo sërish do ta mësojmë nga lista e çmimeve në furrë?