Skip to content

Raporti i Gjorgjievskit pas një viti: 100 autobusë të rinj pa afat dorëzimi dhe rrugë nëntokësore pa çmim të publikuar

1 min. lexim
Shpërndaj
Raporti i Gjorgjievskit pas një viti: 100 autobusë të rinj pa afat dorëzimi dhe rrugë nëntokësore pa çmim të publikuar

Kryetari i Shkupit, Orce Gjorgjievski, e shënoi vitin e parë të mandatit me raport në Qendrën Kulturore Maqedonase (MKC), me interpretime muzikore dhe publik të përbërë kryesisht nga ministra, kryetarë të komunave të Shkupit, drejtorë dhe këshilltarë, kryesisht nga VMRO-DPMNE. Për qytetarët pati edhe video në Facebook. Lista e premtimeve ishte e gjatë. Lista e afateve dhe e çmimeve, shumë më e shkurtër.

Borxhet, shifra kryesore

Gjorgjievski tha se kur mori detyrën gjeti borxh prej gati 300 milionë eurosh. Vitin e kaluar, sipas të dhënave të tij, detyrimet rrjedhëse të Qytetit u ulën për 322 milionë denarë, dhe u shlyen detyrime prej 743 milionë denarësh për kredi, shpronësime, procedura gjyqësore dhe subvencione. Ulja më e madhe është në „Ujësjellës dhe Kanalizim“, për 1,66 miliardë denarë, dhe në NQP, për 634 milionë denarë.

Ndër projektet e përfunduara ose gati të përfunduara përmendi zgjerimin e bulevardit „Boris Trajkovski“ deri në Draçevë dhe urën mes „Lublanskës“ dhe „Skupit“ në Karposh, të dyja me afat deri në fund të vitit 2026, nyjën te Momin Potok dhe rrugët hyrëse drejt urës „Gjeneral Mihajllo Apostolski“, e cila prej disa vitesh qëndron e ndërtuar, por nuk të çon askund. Impianti i pastrimit në Trubarevë, sipas tij, është realizuar mbi 40 për qind.

Premtimet pa afat

Paralajmërimet e mëdha janë për më vonë. Rruga e parë nëntokësore, në bulevardin „Maqedonia“, deri në fund të mandatit. Deri tani pa vlerë të publikuar, pa afat për fillimin e ndërtimit e pa detaje teknike. Urë mes Lisiçes së Re dhe Maxharit, me fillim ndërtimi në vitin 2027. Urë dhe rrugë mes Gjorçe Petrovit dhe Sarajit, në fazë projekti. 100 autobusë të rinj ekologjikë, pa afat të përmendur dorëzimi. Park prej rreth 600.000 metrash katrorë në vendin e „Vardarishtes“, pas sanimit.

Ka edhe paralajmërime më të vogla, praktike: dy garazhe montuese shumëkatëshe pranë Qendrës Klinike me mbi 500 vende parkimi, stacion i ri zjarrfikës në Aerodrom, pranim falas i mbeturinave të vëllimshme në „Drisla“ një herë në javë dhe rihapja e kinemasë „Milenium“ në vitin 2027.

Shatërvani që nuk u ndal kurrë

Kryetari u mburr se përsëri kanë filluar të punojnë shatërvanët „Lulja e lotusit“, „Luftëtari mbi kalë“, „Filipi i Dytë“ dhe „Olimpia“. Vetëm se, siç vunë re edhe mediat, shatërvani „Luftëtari mbi kalë“ nuk ka pushuar kurrë së punuari. Ndoshta në ndonjë vit është ndezur më vonë pas pushimit dimëror, por ka punuar çdo vit.

Një pjesë e projekteve nga raporti janë prej vitesh në planet e qytetit. Prandaj për shkupjanët pyetja e vërtetë nuk është çfarë u paralajmërua, por kur do të mund të ngasin makinën, të parkojnë dhe të shëtisin atje. Nëse rruga nëntokësore me të vërtetë do të jetë gati deri në fund të mandatit, pse sot nuk ka as çmim as datë fillimi?