Inspektorati që duhet të kontrollojë nëse produktet në treg janë të sigurta nuk e di saktësisht as çfarë ka në magazinat e veta. Ky është, shkurt, konstatimi i Entit Shtetëror të Revizionit për Inspektoratin Shtetëror të Tregut (ISHT).

Revizorët dhanë opinion negativ për vërtetësinë dhe objektivitetin e pasqyrave financiare për vitin 2024, ndërsa për përputhshmërinë me ligjet - opinion me rezervë. Nuk ishte bërë regjistrim i plotë i objekteve ndërtimore, softuerëve, licencave dhe stoqeve. Kontabiliteti nuk përputhej me gjendjen faktike, ndërsa mjetet materiale nuk kishin numra inventari.

Detajet tingëllojnë si skeç. Nga katër automjete zyrtare të prishura, tri qëndronin në depon e „Pajak“, ndërsa për njërin është shënuar se është plotësisht i shkatërruar dhe ndodhet në mbeturina. Si shpenzime ishin evidentuar 1,107 milionë denarë për materiale zyre, 791 mijë për formularë dhe 249 mijë denarë për goma makinash - gjithsej rreth 2,15 milionë denarë pa të dhëna përkatëse se ku kanë përfunduar.

Me kuadrot nuk është më mirë. Në vitin 2024 ishin marrë 19 aktvendime për sistemimin e administratorëve në vende inspektorësh, pa para të siguruara në buxhet dhe pa qenë në planin e punësimit. Shtatëmbëdhjetë prej tyre ishin kandidatë pa licencë. Më 30 dhjetor 2024, të njëjtët 17 u kthyen në vendet e vjetra të punës.

Pjesa më e rëndë, megjithatë, është siguria e produkteve. Nga 14 vendet e punës të parapara në atë sektor, deri në fund të vitit 2024 ishin plotësuar vetëm pesë. Nga viti 2022 deri në 2025 u tërhoqën nga shitja 40 produkte pas analizave laboratorike në laboratorë të huaj - por ato analiza nuk i pagoi shteti, por projektet e GIZ-it gjerman dhe Regio Trade. Revizorët paralajmërojnë se kur të mbarojnë paratë e huaja, nuk ka garanci se kontrollet do të vazhdojnë.

Drejtori i ISHT-së, Vllatko Stojkoski, përgjigjet se ai vetë e ka kërkuar revizionin pas marrjes së detyrës, se raporti ka të bëjë me vitet 2023 dhe 2024 dhe se që nga 2025 punohet për plotësimin e kuadrove dhe një zgjidhje të re softuerike me mbështetje të BE-së. Është mirë që dikush ka kërkuar revizion. Por një shtet që nuk mund ta paguajë vetë testin e sigurisë së produkteve në tregun e vet - sa kohë do t'i mbrojë konsumatorët me para të huaja?