Инспекторатот што треба да проверува дали производите на пазарот се безбедни, не знае точно ни што има во сопствените магацини. Тоа е, скратено, наодот на Државниот завод за ревизија за Државниот пазарен инспекторат (ДПИ).

Ревизорите дале неповолно мислење за реалноста и објективноста на финансиските извештаи за 2024 година, а за усогласеноста со законите – мислење со резерва. Не бил направен целосен попис на градежните објекти, софтверите, лиценците и залихите. Сметководството не се совпаѓало со фактичката состојба, а материјалните средства немале инвентарни броеви.

Деталите звучат како скеч. Од четири неисправни службени возила, три стоеле во депото на „Пајак“, а за едно е наведено дека е целосно искршено и се наоѓа во отпад. Како расходи биле евидентирани 1,107 милиони денари за канцелариски материјали, 791 илјада за обрасци и 249 илјади денари за автомобилски гуми – вкупно околу 2,15 милиони денари без соодветни податоци за тоа каде завршиле.

Со кадрите не е подобро. Во 2024 година биле донесени 19 решенија за распоредување административци на инспекторски места, без пари обезбедени во буџетот и без да бидат во планот за вработување. Седумнаесет од нив биле кандидати без лиценца. На 30 декември 2024 година, истите 17 биле вратени на старите работни места.

Најтешкиот дел, сепак, е безбедноста на производите. Од предвидените 14 работни места во тоа одделение, до крајот на 2024 биле пополнети само пет. Од 2022 до 2025 година од продажба биле повлечени 40 производи по лабораториски анализи во странски лаборатории – но тие анализи не ги платила државата, туку проекти на германското ГИЗ и Регио трејд. Ревизорите предупредуваат дека кога ќе завршат странските пари, нема гаранција дека контролите ќе продолжат.

Директорот на ДПИ, Влатко Стојкоски, одговара дека тој самиот побарал ревизија по стапувањето на должност, дека извештајот се однесува на 2023 и 2024 година и дека уште од 2025 се работи на доекипирање и ново софтверско решение со поддршка од ЕУ. Добро е што некој побарал ревизија. Но држава што не може сама да плати тест за безбедноста на производите на сопствениот пазар – колку долго ќе ги штити потрошувачите со туѓи пари?