Tri ditë, 13 raste, 20 persona të privuar nga liria. Ky është bilanci i fundjavës i Ekipit të Punës Task Force të MPB-së, i cili nga 2 deri më 4 tetor veproi në territorin e disa sektorëve për punë të brendshme dhe qendrave rajonale për punë kufitare. Ndër të ndaluarit janë edhe dy shtetas të huaj, nga Polonia dhe nga Çekia.

Goditja më e madhe ishte në Strumicë. Atje policia gjeti dhe konfiskoi 59 rrënjë marihuane me peshë të përgjithshme rreth 680 kilogramë, ndërsa në një rast tjetër edhe një valixhe të madhe udhëtimi plot me marihuanë. Në Shkup, në tri lokacione që i përdorte një person, u konfiskuan tetë qese me rreth 800 gramë marihuanë.

Në Veles, gjatë kontrollit të një shtëpie, policia gjeti 29 qese të vogla me gjithsej 15 gramë kokainë, 14 gramë substancë ngjyrë kafe dhe rreth 5.000 euro. Njësia për luftimin e krimit të organizuar dhe të rëndë kontrolloi katër lokacione: dy persona u privuan nga liria, ndërsa u konfiskuan rreth 200 gramë kokainë, 505 mililitra vaj hashashi dhe 4,58 gramë marihuanë.

Veçohet sidomos rasti nga Singeliqi. Kundër një 18-vjeçari nga Shkupi është ngritur kallëzim penal pasi në objektin ku qëndronte u gjetën dy pako me substancë të bardhë në kokrra. Ekspertiza në MPB konstatoi se bëhet fjalë për 198,46 gramë kokainë.

MPB-ja thotë se këto janë „rezultate konkrete“ dhe paralajmëron aksione edhe më të forta. Është mirë që policia punon në terren. Por a do të lexojmë ndonjëherë një kumtesë po aq të detajuar se kush e organizon tregtinë, e jo vetëm kush e mbante drogën në valixhe?