Три дена, 13 случаи, 20 лица лишени од слобода. Тоа е викенд-сметката на Работниот тим Task Force на МВР, кој од 2 до 4 октомври постапувал на подрачјето на повеќе сектори за внатрешни работи и регионални центри за гранични работи. Меѓу приведените се и двајца странски државјани, од Полска и од Чешка.

Најголемиот удар е во Струмица. Таму полицијата пронашла и одзела 59 стебла марихуана со вкупна тежина од околу 680 килограми, а во друг случај и голем патнички куфер полн со марихуана. Во Скопје, на три локации што ги користело едно лице, биле одземени осум кеси со околу 800 грама марихуана.

Во Велес, при претрес на дом, полицијата нашла 29 мали кеси со вкупно 15 грама кокаин, 14 грама кафеавкаста материја и околу 5.000 евра. Одделот за сузбивање организиран и сериозен криминал, пак, претресувал четири локации: две лица се лишени од слобода, а одземени се околу 200 грама кокаин, 505 милилитри масло од хашиш и 4,58 грама марихуана.

Посебно се издвојува случајот од Сингелиќ. Против 18-годишник од Скопје е поднесена кривична пријава откако во објектот каде што престојувал биле пронајдени две пакувања со бела грутчеста материја. Вештачењето во МВР утврдило дека станува збор за 198,46 грама кокаин.

МВР вели дека ова се „конкретни резултати“ и најавува уште засилени акции. Добро е што полицијата работи на терен. Но дали некогаш ќе прочитаме исто толку детално соопштение за тоа кој ја организира трговијата, а не само кој ја носел дрогата во куферот?